(अ)व्यवस्थितपणा

शर्ट, पॅंट किंवा काहीही, हातात घ्यायचं, गोल गोल असं ४ वेळा फिरवायचं, की जो गोळा तयार होतो तो एका हातात धरायचा, दुस-या हाताने खण उघडायचा, आणि तो गोळा मोकळ्या जागेत नेम धरून भिरकवायचा. अशीच असते ना कपडे ठेवायची पद्धत ! कपडे काय, किंवा इतर कुठलीही गोष्ट काय, साधारण अशाच पद्धतीने ठेवायची, किंवा काढायची असते. म्हणजे, जगात एक मोठ्ठा वर्ग आहे जो ही पद्धत योग्य मानतो.

दुसरा जो वर्ग आहे तो एक ‘व्यवस्थितपणा’ नावाची थियरी आहे, त्यावर विश्वास ठेवतो. त्यानुसार कपड्यांची घडी करणं, गोष्टींचे रकाने राखीव ठेवणं, वह्या, पुस्तके, कागद वगैरे गोष्टींचं वर्गीकरण करणं वगैरे क्रीया करायच्या असतात. त्यांच्या मते:-
१) असं केल्याने गोष्टी हव्या तेंव्हा पटकन मिळतात. (पण असंच पहिल्या वर्गालाही वाटतं.)
२) असं केल्याने खण/खोली नीटनेटके दिसतात. (पहिल्या वर्गाच्या मते हे मानण्यावर आहे.)

तर अशी मतांतरं आहेत. दोन्ही वर्ग आपापल्या पद्धतींवर ठाम आहेत. त्यांना आपापल्या पद्धतीच फायदेशीर वाटतात. आणि त्यामागील कारणंही तितकीच सबळ वाटतात. पण यामुळे घरोघरी जिथे हे दोन वर्ग एकत्र नांदतात, तिकडे त्यांत खटके उडत असतात. मी पहिल्या वर्गात मोडतो. :D
तर; ‘बॉटम लाईन’ अशी आहे की,

‘अव्यवस्थितपणातला जो कम्फर्ट आहे ना कम्फर्ट, तो व्यवस्थित लोकांना कधीच कळणार नाही’
- अ. ज. ओक.