लोक

‘लोक’ हा एक फार मोठा आणि महत्वाचा ‘फॅक्टर’ असतो. बहुतांश लोकं प्रत्येक निर्णय घेताना, वागताना, बोलताना, हा लोक फॅक्टर केंद्रस्थानी ठेवतात. यामुळे मग काय होतं की एका वैचारिक कोषात माणूस अडकत राहतो, आणि अडकतच जातो.  मग वेळोवेळी ‘लोक काय म्हणतील?’, ‘चार लोकात बरं दिसेल का?’ असे प्रश्न आवडीनिवडींची, इच्छा-आकांक्षांची आणि पुढे विचारांची गळचेपी करायला लागतात.

याला वेगळं ‘पडायची’ भीती म्हणावं की वेगळं ‘करायची’ धास्ती ते कळत नाही. पण यामुळे अनेक होऊ शकणा-या गोष्टी होत नाहीत, अनेक घडू शकणारी व्यक्तिमत्व घडत नाहीत, अनेक विचार मांडले जात नाहीत, अनेकदा जे म्हणायचं असतं ते म्हटलं जात नाही कारण एकच; ‘लोक काय म्हणतील...’ माझा तीव्र विरोध असलेली ही एक संकल्पना आहे.

‘लोक काय म्हणतील असा विचार करत राहणा-यांना स्वत: कधी काही म्हणताच येत नाही; किंवा त्यांच्याकडे म्हणण्यासारखं काहीच नसतं’
- अ. ज. ओक